O ikutlwa jang ka boleo jwa gago?
O akanya eng ka dilo tse di sa siamang tse o di dirang letsatsi le letsatsi? A o di tsaya e le kgang e e masisi, kgotsa go wena ke sengwe fela se se fetang ka bonako “ka gonne Jesu o swetse dibe tsotlhe tsa me – tsa nako e e fetileng, tsa jaanong, le tsa isago” (Bakolosa 2:13–14; Bahebera 10:10)?
Kotsi ya boleo mo modumeding ke fa bo sa tlhole bo mo tshwenya. Ke ka nako eo tota o tshwanetseng go simolola go tshwenyega.
Thapelo ya ga Dafide mo Pesalemeng 38
Dafide o bua ka se mo Pesalemeng 38. O simolola ka go kopa Morena gore a se ka a mo kgalema a le mo bogaleng. Mo go Dafide, se a se utlwang se tshwana le metswi e e mo tlhabileng mo go seng sepe se se setseng se siameng mo go ene. Go tswa foo o bua se se latelang:
Ga go na botoka mo nameng ya me ka ntlha ya bogale jwa gago; le fa e le kagiso mo marapong a me ka ntlha ya boleo jwa me. – Pesalema 38:3
Go tshwana le fa boleo bo ama mmele wa gagwe ka botlalo, le marapo a gagwe. Ke boammaaruri gore ditlamorago tsa boleo gantsi di ka nna bolwetse, mme a ruri maemo otlhe a bolwetse ke ditlamorago tsa boleo mo botshelong jwa gago? O akanya eng? Fano ke ditshupo di se kae tse di ka go thusang:
Ditshupo tsa boleo
- Baroma 3:9–12; 5:12–15; 6:23; 6:12–14 (Boleo jwa batho bo bogolo thata.)
- 2 Bakorinthe 5:21 (Jesu o ile a dirwa boleo mo boemong jwa rona gore re amogele boitshwarelo.)
- Bagalatia 5:19–22 (Fa o ipotsa gore dibe tsa gago ke eng, di bapise le lenaane le.)
- Bakolosa 3:5–6 (Bolaya dibe tse di umakilweng fano.)
- Bahebera 12:1 (Baya kwa thoko merwalo le boleo jo bo re dikaganyeditseng.)
- Jakobo 1:14–15 (O ipaya wa dumelela boleo.); le 5:14–16 (Thapelo e fodisa boleo.)
- 1 Johane 1:8–10 (Fa re itsietsa, le se re tshwanetseng go se dira ka jone.)
Boima jwa boleo
Dafide o bona boleo jwa gagwe jaaka mokgweleo (Bahebera 12:1) o o mo diretseng bokete thata, mme o ama mmele wa gagwe otlhe. Ga re na go itse gore a se se kayang ke tota kgotsa ke tshwantsho, mme go bonala go mo amile ka tsela e e sa siamang, mo e leng gore o ne a lwala. Ga se ene fela yo o amegang, mme o bona gore ditsala tsa gagwe (temana 11) di bona se se diragalang mme ga di eme le ene ka maikutlo, fa baba ba gagwe bone ba dirisa sebaka seo (temana 12). Le fa go ntse jalo, o lemoga gore jaanong ke nako ya go didimala (temana 13), ka gonne o itse gore mo maemong a, Modimo ke ene yo o tla mo golorang. Go tswa foo o dira polelo eno ya botlhokwa:
Gonne ke tlaa bolela tlolo ya me ya molao; ke tlaa hutsafalela boleo jwa me. – Pesalema 38:18
Tlhatlhanyo
Potso ke eo re simolotseng ka yone: o tshwenyegile go le kae ka boleo? Mo godimo ga moo: o tlaa dira eng ka gone?